L Semesterplan og emneinformasjon

Korleis importere og tilpasse mal

Introduksjon

Ein oversiktleg semesterplan er viktig for å gje studentane oversikt over det som skal skje dette semesteret. Når ein skal organisere Canvas-rommet for eit emne, er det fleire måtar å strukturere det på. Canvas-systemet legg opp til at ein nyttar modular aktivt som strukturerande element, men semesterplanen kan også vere eit godt utgangspunkt for studentane når dei skal finne innhald på Canvas. Her treng ikkje det eine å utelukke det andre; ein kan nytte både modular og semesterplanen som strukturerande element.

I denne instruksjonen skal vi sjå på korleis vi kan lage ein oversiktleg semesterplan ved å bruke tabell-verktøyet. Vi har laga ein mal som ein kan importere frå Canvas Commons og tilpasse til sitt eige emne. Malen er organisert som ein introduksjonsmodul, som kan vere eit utgangspunkt for emnet.

Semesterplan mal

1) Hent og importer malen frå Canvas Commons

Vi har gjort klar ein ferdig mal for deg. Denne malen er ein modul som inneheld to sider, "Om emnet" og "Semesterplan". I modulen ligg det også nokre malar til øktplanar, som kan brukast.

Malen har vi lagt i Canvas Commons, slik at du lett kan hente den til ditt Canvas-emne.

Slik hentar du den:

Stå på framsida i emnet der du vil bruke malen.
Klikk på "Importer frå Commons" i menyen til høgre.
I søkefeltet i Commons skriv du "Emneinformasjon".
Klikk på malen når den dukkar opp i søkeresultata.
Vel "Importer/Last ned" og marker emnet/emna du vil importere malen til.
Klikk på den blå knappen "Importer til emne".

Malen vil no legge seg som ein ny modul i emnet ditt. Du finn den ved å gå til "Modular" i emnemenyen og leite etter ein modul som heiter "Emneinformasjon".

2) Juster tabellen i semesterplanen etter ditt behov

Malen for semesterplanen er eit utgangspunkt. Du må sannsynlegvis justere tabellen slik at den passar til ditt emne.

Legge til eller fjerne veker (rader)/legge til eller fjerne kolonnar:
1. Klikk "Rediger" for å opne redigeringsverktøyet.
2. Plasser markøren i ei celle i tabellen.
3. Ein meny for tabell-verktøy dukkar opp i verktøylinja. Klikk på Tabell-ikonet.
4. Vel Rad, og deretter "Sett inn rad før" eller "Sett inn rad etter". For å slette, vel du "Slett rad".

Det same prinsippet gjeld for å legge til og fjerne kolonnar i tabellen.

Slå saman celler (t.d. for samlingar over fleire dagar):
1. Marker dei cellene du vil slå saman (t.d. to eller tre dagar i "Dato"-kolonna).
2. Klikk på Tabell-ikonet i verktøylinja.
3. Vel Celle -> "Slå saman celler".

Dette er spesielt nyttig for å vise at ei undervisningsøkt eller ei samling går over fleire dagar.

3) Opprett eigne sider for kvar undervisningsøkt

Hovudprinsippet er: Semesterplanen gir oversikt, medan eigne sider gir detaljar. For kvar økt, førelesing eller samling bør du lage minimum ei ny innhaldsside. Skal du ha fleire innhaldssider som er knytt saman, så bør desse organiserast i ein eigen modul.

I "Emneinformasjon"-modulen, finn du tre malar for slike økt/samlingsplanar (ein enkel uten designelement og to som nyttar designelement frå DesignPlus).

Slik brukar du desse malane:

Gå til "Modular" i emnemenyen.
Finn modulen "Emneinformasjon".
Vel ein av dei tre malane og trykk på menyen (tre vertikale prikkar) til høgre.
Vel "Dupliser"
Gå inn på den nye sida (kopien) og trykk "Rediger"
Gi sida ein tydeleg tittel, for eksempel: "Økt 1: Introduksjon til medievitskap" eller "Samling 2 – Dag 1: Kvalitativ metode".
På denne sida legg du inn all relevant informasjon for økta:
- Informasjon/Læringsutbytte for økta
- Pensum
- Forarbeid: Kva skal studenten gjere før økta?
- Organisering av økta: Ei kort liste over kva som skal skje.
- Undervisningsmateriell: Presentasjonar, dokument, lenkjer og andre element som skal nyttast i økta
- Etterarbeid: Kva bør studenten jobbe med etter økta.
Klikk "Lagre og publiser".

Gjer dette for alle øktene i semesteret.

4) Lag lenker frå semesterplanen til sider / modular

For at studentane skal kunne bruke semesterplanen til å navigere i emne-rommet, må du kople semesterplanen saman med innhaldssidene du nettopp laga.

Lenke til ei side

Gå tilbake til semesterplan-sida di og klikk "Rediger".
Marker teksten i tabellen som skal bli ei lenke (t.d. tittelen på økta i "Tema"-kolonna).
Klikk på lenke-ikonet i verktøylinja og vel "Emnelenker".
Ein meny sprett opp på høgre side. Utvid kategorien "Sider".
Finn og klikk på namnet til den innhaldssida du vil lenke til.

Lenke til ein modul

Gå tilbake til semesterplan-sida di og klikk "Rediger".
Marker teksten i tabellen som skal bli ei lenke (t.d. tittelen på økta i "Tema"-kolonna).
Klikk på lenke-ikonet i verktøylinja og vel "Emnelenker".
Ein meny sprett opp på høgre side. Utvid kategorien "Modular".
Finn og klikk på namnet til den modulen du vil lenke til.

Lenka blir no automatisk sett inn. Fordelen med å bruke "Emnelenker" er at lenka aldri blir broten, sjølv om du skulle endre namnet på sida seinare.

I videoen viser vi korleis ein lagar lenke til ei side, men prosessen er lik for å lage lenke til modular, bortsett frå at ein vel "Modular" i staden for sider.

5) Last opp og lenk til filer på ein ryddig måte

PowerPoint-presentasjonar, PDF-artiklar og andre dokument høyrer heime i "Filer", men bør lenkast til der studenten treng dei – anten frå semesterplanen eller frå ei innhaldsside.

Tips: Lag ein ryddig mappestruktur i "Filer" før du startar. For eksempel:

Førelesingar
Pensumartiklar
Oppgåvetekstar

Slik lenkar du til ei fil:

Last opp fila du treng i "Filer"-verktøyet i emnet ditt.
Gå til sida der du vil plassere lenka (t.d. innhaldssida for "Økt 1"). Klikk "Rediger".
Skriv ein beskrivande tekst, f.eks. "Last ned presentasjonen her". Marker teksten.
Klikk på lenke-ikonet -> "Emnelenker", akkurat som i førre steg.
Vel "Filer" i den øverste val boksa og vel "Emnefiler"
Vel riktig mappe og finn og klikk på fila du vil lenke til.

No slepp studentane å leite i "Filer"-verktøyet. Dei finn alt i kontekst.

6) Rydd i emnemenyen for betre navigasjon

Når semesterplanen er hovudvegen, kan vi fjerne unødvendige sidevegar. Ein enkel og ryddig emne-meny gjer det tydeleg for studentane kvar dei skal navigere.

Gå til "Innstillingar" -> "Navigasjon".

Her ser du to lister. Den øvste viser menyelement som er synlege for studentane. Den nedste viser dei som er skjulte. Dra og slepp for å endre.

Vi anbefaler at du held desse synlege:

Heim
Kunngjeringar
Modular
Vurderingar
Personar
Pensum
(Zoom)

Desse kan du trygt skjule for studentane (dra dei til den nedste lista):

Sider (studentane skal navigere via "Heim"/semesterplanen, ikkje rote i ei lang liste med sider)
Filer (filer skal lenkast til der dei er relevante)
Oppgåver (for direkte tilgang til innleveringar)
Quizar
Læringsmål
Samarbeid
Vurderingsskjema
... og andre verktøy du ikkje brukar aktivt.

Hugs å bla heilt ned og klikke på den blå "Lagre"-knappen!

Her kan du sjå korleis du endrar emne-menyen: