BLUBV
Studentar med internasjonalt semester

Høgskulen i Volda (HVO) legg til rette for studentar som i staden for å ta 30 stp fordjuping hos oss, ønsker å ta 30 studiepoeng i eit anna land, altså eit internasjonalt semester. Tilrettelegging av praksis kan vere aktuelt for dei som vel emne som ikkje har integrert praksis. Vi vil legge til rette for at studentane kan få gjennomført dei siste 5 praksisdagane før, eller etter studenten reiser på utveksling. Oppgåva i praksis er profesjonsretta mot yrket som studenten skal kvalifisere seg til.

FORVENTA KOMPETANSE

Studenten meistrar å knyte teori frå fordjupinga til praksis.

OPPGÅVER FØR PRAKSIS

Kontakte praksislærar i god tid før praksis for å opprette kontakt og avtale tid for oppmøte med meir.

Førebu deg til praksis med å gjere deg kjent med innhaldet i praksis, studieprogamplan, emneplanar og fagstoff.

Skrive eit notat til praksislærar med forventningar for praksis, og mål for sjølvutvikling. Ta omsyn til tilbakemeldinga du fekk i vurdering praksis 2. år (for heiltid) eller 3. år (for deltid).

Del notat med forventningar og mål for sjølvutvikling med praksislærar seinast veka før praksis.

OPPGÅVER I PRAKSIS

Delta i ein samtale med styrar der du får informasjon om beredskapsplan, teieplikt, organisasjonsform, profil/visjon, pedagogisk grunnsyn og andre tilhøve i barnehagen som er viktig for deg å ha kjennskap til.

Ta aktivt del i barnehagen sine arbeidsoppgåver og vise initiativ og engasjement i arbeidet med barn, personale og føresette.

Skrive rettleiingsgrunnlag til rettleiingstimen. Del med praksislærar. Ver aktiv i rettleiingstimen (90 minutt per student – individuell eller i gruppe), og skriv notat etter rettleiinga. Gjer praksislærar kjent med praksisvurderinga frå sist praksis. Det må settast av tid frå desse 90 minutta til vurderingssamtale fredag.

Gjennomføre leiardagar i praksis.
- Sjå informasjon lenger nede.

Delta i vurderingssamtale med praksislærar siste dag i praksis. Vurderingssamtalen skal ta utgangspunkt i vurderingsskjema.

Dele alt skriftleg arbeid med praksislærar i Teams.

OPPGÅVE LEIARDAGAR

Studenten skal planlegge, gjennomføre og vurdere minimum 2 leiardagar. Det er ikkje eit krav at studentane lagar ein fullstendig dagsplan, men ei oversikt over dagen med bakgrunn i barnehagen si dagsrytme, vaktplan og vekeplan.

Plan for leiardagane skal delast med praksislærar på førehand for rettleiing, og studenten må kommunisere innhaldet munnleg for medarbeidarane som skal samarbeide med studenten. Dialog er viktig når ein ikkje har ein skritleg dagsplan.
Studenten skal sette seg mål om eiga leiarrolle før leiardagane, og skive ei vurdering som vert delt med praksislærar etterpå.

Før leiardagane kan student og praksislærar vurdere om ein eller fleire av leiardagane skal gjennomførast med grunnbemanning.

VURDERING PRAKSIS

Vurderingsskjema

Blir lagt ut her.

Vurderingskriterier

For å få godkjent praksis:

Innhaldet i leiardagane er tilpassa barnehagen sine planar. Studenten vidarefører vekerytme og arbeidsdeling som vert nytta i barnehagen.
Studenten kan ta i bruk didaktisk og teoretisk kompetanse i planlegging, gjennomføring og vurdering. Både formelle og uformelle læringsaktivitetar skal vere inkludert i leiardagane.
Studenten deler plan for leiardagane i god tid slik at praksislærar kan rettleie studenten før gjennomføringa, og studenten kan gjere eventuelle endringar på planen etter rettleiing.
Plan for leiardag vert gjort kjent for medareidarane av studenten.
Studenten skal synleggjere ulike faglege val i løpet av dagen, og vise til refleksjonar i vurderinga av leiardagane.
Gjennom leiardagane har studenten oversikt over barnegruppa, og sørger for at dei har det trygt, samstundes som han skapar gode og omsorgsfulle relasjonar til barnegruppa og enkeltbarn.
Studenten samarbeidar med personalet og løyser situasjonane som oppstår dersom det vert endringar i planar. Om studenten observerer manglar, vert beskjedar gitt på ein høfleg og god måte, slik at måla for dagen vert nådd.
Studenten er ein god rollemodell både for barn og personale.
Studenten skal ha kontakt med dei føresette, ta i mot og gi beskjedar.
Studenten tek i mot rettleiing på ein god måte.

OMGREPSAVKLARINGAR

Samtale med styrar

Tidleg i praksis skal styrar samle studentane til ein samtale for å gi informasjon om det som er viktig å ha kjennskap til for å ha praksis i barnehagen. Dette kan til dømes vere om beredskapsplan, teieplikt, organisasjonsform, profil og vikarbruk.

Samtalen med styrar skal bidra til å trygge studentane, slik at dei vågar å gi konstruktive tilbakemeldingar til styrar og praksislærar i løpet av praksis. Styrar skal vise at han er ein støttespelar for studenten og ønsker at han skal bli godt ivaretatt i praksis. Styrar kan også dele sine forventingar til studenten, gi tilbakemeldingar til studenten sine forventingar til barnehagen, og stille spørsmål til studenten om kva han sjølv kan bidra med for å få eit godt læringsutbytte i praksis.

Om leiardagar

Studenten skal gjennomføre leiardagar i praksis alle studieåra. Praksislærar skal vere til stade under gjennomføringa av leiardagane for å rettleie undervegs og gi framovermelding og ei vurdering. Dersom praksislærar ikkje kan vere tilstade, skal styrar eller ein annan pedagog ha ansvaret.

Student og praksislærar gjer avtale om tidspunkt for gjennomføring av leiardagane seinast første praksisveke. Studenten skal dele plan/oversikt for leiardagen til rettleiing med praksislærar før gjennomføring. Rettleiinga før kvar leiardag skal vere retta mot leiardagen og rolla som pedagogisk leiar. For å sikre sjølvutvikling skal studenten velje seg eit område i leiarrolla som han vil arbeide konkret med i gjennomføringa av leiardagen. Når han har valt område, skal han formulere eit mål som han ønskjer å nå i gjennomføring. Utifrå rettleiing gjer studenten eventuelle endringar i planen/oversikta før gjennomføring. Studenten skal ta i bruk didaktisk og fagleg kompetanse i arbeidet. Gjennom dialog skal studenten gjere planen kjent for personalet. Det er viktig å klargjerer roller og forventingar til kvarandre. Slik kan både student og personalet skaffe seg oversikt over oppgåvene den enkelte har.

I plan/oversikt for leiardagane må studenten inkludere både kvardagssituasjonar (til dømes leik og garderobesituasjon) og styrte aktivitetar (til dømes samlingsstund). I gjennomføringa skal studenten kvart år syne at han har oversikt over barne- og personalgruppa, at barna har det trygt, og at han kan skape gode og omsorgsfulle relasjonar til barna. Gjennomføring av leiardagen skal danne grunnlag for refleksjon over eiga leiing. Studenten skal lage mål om eiga rolle som leiar til leiardagane. I tillegg skal studenten ha fokus på progresjon for gjennomføring av leiardagar:

1. år: leiing med fokus på rutinar, dagsrytme, arbeidsdeling og relasjonar til barna.

2. år: fokus på leiing av barn og barnegrupper i formelle og uformelle aktivitetar, leiing av medarbeidarar og leiing av prosjektarbeid.

3. år: fokus på leiing av barn i formelle og uformelle aktivitetar, leiing av medarbeidarar og leiinga av utviklingsarbeid

Det er forventa at punkta for første og andre år følg med vidare inn i neste studieår.

Studenten skal også dele ei skriftleg vurdering av seg sjølv som leiar og gjennomføringa av leiardagane (om lag ½ side) med praksislærar før neste rettleiing. I denne vurderinga skal studenten ha fokus på mål for gjennomføring av leiardagar.

Vi oppfordrar til at studentane kan gjennomføre fleire leiardagar enn det som står dersom det let seg gjere, eller om praksislærar vurderer det som nødvendig. Studenten følger då avdelinga sine planar for dagen. Forventingane studenten blir møtt med i høve leiardagane må tilpassast kvar studenten er i studieløpet.

Progresjon leiardagar heile studiet:

Første semester har studentane ikkje leiardag som arbeidskrav, men skal observere overgangs- og rutinesituasjonar i barnehagen. Dette er ein del av kartlegginga studentane gjer før gjennomføring av leiardagar andre semester.

Andre semester skal studenten lage ein fullstendig skriftleg dagsplan for begge leiardagane. Planane skal innehalde tid, kven, kva, korleis og kvifor. I gjennomføringa av leiardagen skal studenten vise at han har ei begynnande oversikt over rutinar, dagsrytme og arbeidsdeling og kan skape gode relasjonar til barna.

Tredje semester skal studenten også lage ein fullstendig skriftleg dagsplan for første leiardag. Innhaldet skal ta utgangspunkt i barnehagen si dagsrytme og overordna planar. I gjennomføringa av leiardagen skal studenten spesielt vise at han har god oversikt over rutinar, dagsrytme og arbeidsdeling. I tillegg til at han trygt kan leie barn i formelle og uformelle aktivitetar, og syne progresjon i leiing av medarbeidarar.

I tredje semester (andre leiardag), fjerde og sjette semester er det ikkje eit krav at studentane lagar ein fullstendig dagsplan, men ei oversikt over dagen med bakgrunn i barnehagen si dagsrytme, vaktplan og vekeplan. Denne oversikta blir delt med praksislærar og kommunisert munnleg for dei tilsette på avdelinga. Dialog med alle medarbeidarar er spesielt viktig når ein ikkje har ein detaljert skriftleg dagsplan å følgje.

I tredje semester skal studenten, med utgangspunkt i ein didaktisk modell, skrive ein plan for ein kvardagssituasjon (garderobe-, måltid-, eller stellesituasjon) for andre leiardag.

Fjerde semester kan leiardagane gjennomførast med grunnbemanning. Praksislærar vurderer om dette er forsvarleg. Femte semester (fordjuping) bør studenten skaffe seg oversikt over avdelinga sin struktur og rutinar, som ei kartlegging til leiardagar sjette semester. Sjette semester bør leiardagane gjennomførast med grunnbemanning. Det er praksislærar sitt ansvar å bestemme kven og kor mange av grunnbemanninga som ikkje skal vere tilstade, og gi dei andre arbeidsoppgåver. Dette er ønskjeleg for å gi studenten eit meir realistisk bilde av barnehagekvardagen. I gjennomføringa sjette semester skal studenten ha fokus på leiing av barn i formelle og uformelle aktivitetar, leiing av medarbeidarar og leiinga av utviklingsarbeid på avdelingen.

Kontakt

Hanne Elin Harnes

Rådgjevar og praksiskoordinator

harnesh@hivolda.no

700 75 439

Synnøve Riste bygget, SR211