BARNEHAGELÆRARUTDANNING Tilbakemelding og vurdering

I følgje nasjonal forskrift for barnehagelærerutdanning skal praksis vere rettleia, vurdert og variert. Rettleiing og vurdering av studentar i praksis er eit felles ansvar for praksislærar, barnehageleiar og oppfølgingslærar,. Praksis skal bli vurdert etter skalaen bestått/ikkje bestått med ei avsluttande vurdering for kvart studieår. Studenten har to forsøk på praksis.

Formativ vurderingsforståing

Formativ vurderingsforståing skal gjelde så langt ein rår. Det tyder at ein vurderer for å danne ei forståing om korleis ein fremmer læringsutbytte og gode utviklingsprosessar for studenten. Og at ein må tone ned den summative vurderinga, fordi denne vurderingsforma i for stor grad er ei vurdering som «summerer» og reknar saman slik at ein til slutt har eit «rett tal». Framovermeldingar til studentane og undervegsvurdering i løpet av praksisperiodane skal vektleggast.

Formativ vurderingsforståing: Praksislærar skal gje studentane gode framovermeldingar. Kvar er studenten? Kvar skal studenten? Korleis best kome dit? Ei god framovermelding vil hjelpe studenten til å lukke gapet mellom noverande og ønska prestasjonsnivå. Felles for konstruktive og gode framovermeldingar:

er beskrivande, i mindre grad vurderande og slett ikkje dømmande
er ikkje generelle, men handlar om noko konkret eller spesifikt

har fokus på sterke sider, ikkje svake
er retta mot noko mottakaren kan gjere noko med
har fokus på meistring, ikkje på nederlag og tap
er imøtekommande, har eit positivt siktemål og er ikkje påtrengjande

Samtidig er det viktig å stoppe opp undervegs og sikre at studenten har fått med seg framovermeldingane slik dei er meint. Det er også viktig å få studenten med i vurderinga gjennom sjølvrefleksjon og eigenvurdering. Kva mål har studenten for praksis? Kva vil studenten meistre, og i kva grad? Korleis arbeide for å nå målet? Kva er studenten god i? Kva er vanskeleg? Dette må studenten kunne seie noko om, og praksislærar må la det ligge til grunn for gode rettleiingssamtalar i praksisperioden.

For å sikre progresjon i praksis og i vurderinga av studenten frå første til siste studieår, skal det bli tatt utgangspunkt i læringsutbyttebeskrivingane i emneplan for praksis og arbeidskrav i praksis når praksislærar gir framovermeldingar, rettleiar og vurderer studenten. Ein del av vurderinga skal bli tatt med vidare til neste praksisperiode for å sikre framovermeldingar frå ein praksislærar til den neste.

Retningslinjer for vurdering

Vurderingsskjema skal fyllast ut og digitalt signerast i MOSO. Alle utfylde skjema må handsamast som fortruleg og skal vere unnateke offentleg innsyn. Praksislærar og faglærar er såleis underlagt teielovnaden i alt arbeid med vurdering av studentar. Viser til § 13 i Lov om behandlingsmåten i forvaltningssaker. Studenten har teieplikt i høve vurdering av medstudentar i den grad dei får kjennskap til dette.

Vurderinga skal skje undervegs i praksis som utgangspunkt for læring og utvikling, og til slutt i praksis skal studenten få ei vurdering av praksis som heilheit (stått/ikkje stått).
Vurderingane skal leggjast fram munnleg for studenten, og studenten får tilgang til vurderingsskjemaet i MOSO. Saman med praksislærar signerer studenten digitalt på at informasjonen om vurderinga er gitt.
Både frammøte og gjennomføring av arbeidskrava i praksis må vere godkjende for å oppnå karakteren stått i praksis.

Vurderingsskjema blir skrevet og sendt inn via MOSO.

Vurdering av arbeidskrav

Praksislærar vurderer arbeidskrava til godkjent/ikkje godkjent på skjema for vurdering og rettleiing. I tillegg skal praksislærar gi ein kommentar til kvart av arbeidskrava. Ein student som får underkjent eit arbeidskrav, får eitt nytt forsøk på å fullføre arbeidskravet. Dette må skje snarast råd, det er difor viktig at gjennomføring av arbeidskrava blir lagt til eit tidspunkt som gjer det mogleg å gjennomføre eit andre forsøk.

Prosedyre der det er tvil om karakter

Dersom det er tvil, eller fare for at ein student får ikkje stått i praksis, må studenten snarast råd få kjennskap til dette. Praksislærar skal etter samråd med styrar, ta kontakt med studieleiar og gje melding om at studenten står i fare for å få ikkje stått. Studieleiar får skjema 3A eller 3B som skal danne grunnlag for skjema1 Fare for ikkje stått i praksis. Skjema 1 blir sendt til barnehagen, og praksislærar gjer dette kjent for studenten som signerer og får ein kopi.

Meldinga om fare for ikkje stått er ein dokumentasjon på at studenten er gjort merksam på situasjonen og får høve til å betre prestasjonen/kompetansen etter rettleiing av praksislærar og styrar. I nokre høve bør også studieleiar/praksiskoordinator/faglærar gi rettleiing til studenten etter at skjema 1 er mottatt. Den endelege avgjerda om ikkje stått i praksis vert tatt av praksislærar i samråd med styrar, faglærar og studieleiar.

Studenten sin praksis kan berre bli sett til ikkje stått dersom studenten har fått skriftleg melding (skjema 1) på førehand. Dersom det oppstår ein situasjon som kjem under kriteria for særskild skikkavurdering, kan det derimot føre til direkte stryk og avbroten praksis. Dersom det er tvil om dette, skal praksislærar be om ein samtale med studieleiar.

Rutine i samband med karakter ikkje stått

Dersom studenten får praksiskarakteren ikkje stått vert det halde særskilt vurderingsmøte mellom studenten, praksiskoordinator, studieleiar og eventuelt praksislærar og faglærar. Vurdering frå praksis vil danne grunnlag for ein samtale mellom partane.

Ein student som får ikkje stått i praksis får høve til å gjennomføre eitt nytt praksisforsøk. Studenten får i ny praksisperiode særskild rettleiing av ein ny praksislærar på det området studenten har vist manglar. Praksislærar skal vere kjend med vurderinga frå perioden med styrk, for å rettleie mest mogleg spesifikt på det studenten skal forbetre.

Får studenten ikkje stått på det andre praksisforsøket, må studenten avbryte barnehagelærarutdanninga ved HVO. Ein student som har ikkje stått i praksis frå eit studieår, får ikkje flytte opp i neste studieår.

Vurdering om ein student er skikka for yrket

Sjå eigen modul om skikkaheitsvurdering her: https://hivolda.instructure.com/courses/1986/pages/vurdering-om-ein-student-er-skikka-for-yrket?module_item_id=214134